Hacıqabul, Samux və Tovuz rayon Polis şöbələrinin yeni binalarının açılışı olub

Hər üç tədbirdə Azərbaycan Respublikasının daxili işlər naziri, general-polkovnik Ramil Usubov iştirak edib.

Daxili İşlər Nazirliyinin mətbuat xidmətindən Lent.az-a verilən məlumata görə, tikintisinə ötən ilin aprelində başlanmış inzibati binalar ən müasir standartlara uyğun tikilib, bütün zəruri avadanlıq, kommunikasiyalar və mühəndis qurğuları ilə təchiz edilib, xüsusi təyinatlı mebel və inventarla təmin olunub. İnzibati binalarda Qeydiyyat və şəxsiyyət vəsiqəsi, Dövlət yol polisi bölmələri, Növbətçi hissə və digər xidməti otaqlar yaradılıb.

Nazir Ramil Usubov görülən işləri yüksək qiymətləndirib və əməkdaşların normal fəaliyyət göstərməsi üçün lazımi şəraitin yaradılmasından məmnunluğunu bildirib, tövsiyələrini verib.

Nazir bildirib ki, Prezident İlham Əliyevin diqqət və qayğısı sayəsində bu gün Daxili İşlər Nazirliyi müasir tələblərə cavab verən texniki və xüsusi vasitələrlə təmin olunub, şəxsi heyətin iş, həmçinin sosial-məişət şəraiti ilbəil yaxşılaşmaqdadır. Bütün bunlar şəxsi heyəti daha yaxşı işləməyə ruhlandırır, polislə ünsiyyətdə olan vətəndaşların rahatlığına xidmət edir.