Prezident İlham Əliyev Sovet İttifaqı Qəhrəmanı Qafur Məmmədovun adını daşıyan parkda olub -

Lent.az-ın AzərTAc-a istinadən məlumatına görə, dövlət başçısı İlham Əliyev alman faşizminə qarşı müharibədə misilsiz rəşadət nümunəsi göstərmiş Sovet İttifaqı Qəhrəmanı Qafur Məmmədovun büstü önünə gül dəstəsi qoyub. Sonra Azərbaycan Prezidenti parkda yaradılan şəraitlə tanış olub.

Qafur Məmmədovun adını daşıyan park da dövlət başçısının Bakı şəhərində parkların və xiyabanların əsaslı şəkildə yenidən qurulması ilə bağlı verdiyi tapşırıqlara əsasən qısa müddətdə yenidən qurulub. Xüsusi tərtibatı ilə diqqəti cəlb edən parkda müasir fəvvarə quraşdırılıb. Parkdakı yaşıllıq zolaqları təzələnib, çoxlu sayda bəzək və gül kolları əkilib. Parkın işıqlandırma sistemi də tamamilə dəyişdirilib. Əhalinin istirahəti üçün burada bütün lazımi şərait yaradılıb.

Parkla tanışlıqdan sonra Prezident İlham Əliyev Sovet İttifaqı Qəhrəmanı Qafur Məmmədovun qardaşı qızı Tamilla Məmmədova ilə görüşüb söhbət edib.