“Vətən” Cəmiyyətinin üzvləri danimarkalı deputatlarla görüşüblər

Diasporla İş üzrə Dövlət Komitəsinin mətbuat xidmətindən Lent.az-a verilən məlumata görə, görüşdə “Vətən” Cəmiyyətinin sədri Səfər Sadiqi Azərbaycan və türk icmalarının əlaqələri, Danimarkada fəaliyyət göstərən türkdilli xalqların icmalarının birliyinin yaradılmasına dair irəli sürdüyü təklifin mahiyyəti, rəhbəri olduğu qurumun qarşısında duran vəzifələr barədə məlumat verib.

“Vətən” Cəmiyyətinin üzvləri Zaur Qubatov və Mehriban Əliyeva Azərbaycan torpaqlarının Ermənistan tərəfindən işğalı, Azərbaycanın iqtisadi inkişafı və apardığı sülhməramlı siyasət barədə danışıblar. Daha sonra görüşdə Azərbaycan torpaqlarının işğalı, BMT-nin bu işğalın dayandırılmasına dair 4 qətnaməsinin əməl olunmadığı və 1 milyon azərbaycanlının qaçqın olmasının Danimarka parlamentində müzakirəyə çıxarılması yolları müzakirə edilib.

Danimarka parlamentinin üzvü Hüseyn Arac bu təklifin həyata keçməsi üçün öz məsləhətlərini, gələcəkdə birgə çalışacaqlarını və Azərbaycanla bağlı tədbirlərdə Yıldız Akdoğanla birgə iştirak edəcəklərini bildirib.