“Qardaşlar arasında bəzən kiçik problemlər ola bilər”

Mustafa Kabakçı: “Qarabağ məsələsində irəliləyiş olmasa, Türkiyə parlamenti Ermənistanla imzalanmış protokolları təsdiqləməyəcək”

“Qardaşlar arasında zaman-zaman kiçik problemlər ola bilər.

Ancaq bu, qardaşlığımızın pozulmasına, araya soyuqluq girməsinə səbəb ola bilməz. Türkiyə-Azərbaycan qardaşlığının pozulması mümkün deyil”.

Bu sözləri Bakıda APA-ya açıqlamasında Türkiyə Böyük Millət Məclisinin Türkiyə-Azərbaycan dostluq qrupunun sədri Mustafa Kabakçı deyib. Hakimiyyətdəki Ədalət və İnkişaf Partiyasının (AKP) üzvü olan M. Kabakçı bildirib ki, Ermənistanla imzalanmış protokolların təsdiqlənməsi üçün parlamentə təzyiq göstərilməsi mümkünsüzdür: “Mən parlamentin üzvüyəm. Qarabağ məsələsində irəliləyiş olmadan protokolların təsdiqlənməsi ehtimalını görmürəm. Türkiyədəki və parlamentimizdəki ümumi qənaət budur. Ermənistan ən azı işğal etdiyi bölgələrdən bir qismini boşaltmalıdır”.

M. Kabakçı protokolları imzalamaqla Qarabağ məsələsini dünyanın gündəminə gətirdiklərini söyləyib: “Protokollar imzalanarkən masanın arxasında dayanan Minsk Qrupunun həmsədr ölkələri indi vəzifələrini yerinə yetirmək məcburiyyətindədir. Onlar işğal altındakı Azərbaycan torpaqlarının geri qaytarılmasını təmin etməlidir. Bu məsələdə irəliləyiş Türkiyə ictimaiyyətini rahatladacaq. İrəliləyiş olmazsa, mən bu protokolların parlamentdən keçməsinin mümkün olmadığı qənaətindəyəm. Buna da əminəm”.