Prezidenti İlham Əliyev Sinqapur prezidenti və baş naziri ilə görüşüb

Lent.az-ın AzərTAc-a istinadən verdiyi məlumata görə, görüşdə xüsusi vurğulanıb ki, prezident İlham Əliyevin bu səfəri iki dövlət arasındakı münasibətlərdə çox mühüm və tarixi bir hadisədir. Bu səfər Sinqapurla Azərbaycan arasında əlaqələrin bütün sahələrdə inkişafına güclü təkan verəcək.
Bildirilib ki, dövlətlərimiz arasında iqtisadi, ticari və enerji sahələrində müəyyən əlaqələr olsa da bu, hər iki ölkənin mövcud potensialını əks etdirmir.
Danışıqlar zamanı iki ölkə arasında əməkdaşlığın inkişaf etdirilməsi üçün əlaqələndirici bir qurumun yaradılması barədə razılığa gəlinib.
Ölkə başçısı İlham Əliyev bu gün həmçinin dövlət səfəri çərçivəsində Sinqapurun baş naziri Li Hsien Loonq ilə görüşüb.

Geniş tərkibdə keçirilən görüşdə dövlətlərimiz arasında müxtəlif sahələrdə qarşılıqlı faydalı əməkdaşlığın perspektivləri müzakirə olunub. Azərbaycan və Sinqapur arasında qarşılıqlı sərmayə qoyuluşu məsələlərinin müzakirəsi zamanı vurğulanıb ki, bu istiqamətdə artıq müəyyən fəaliyyət mövcuddur. Azərbaycan Respublikasının Dövlət Neft Şirkəti Sinqapurda, habelə qarşı tərəfdən də bir neçə şirkət Azərbaycanda iş qurub.
Görüşdə hər iki tərəf üçün maraq doğuran digər məsələlər ətrafında fikir mübadiləsi aparılıb. Qarşılıqlı səfərlərin daha tez-tez həyata keçirilməsinin əməkdaşlığın uğurlu inkişafında əhəmiyyəti vurğulanıb.
Xatırladaq ki, noyabrın 21-də Sinqapur Respublikasının prezidenti Toni Tanın adından bu ölkədə dövlət səfərində olan Azərbaycan Respublikasının prezidenti İlham Əliyevin şərəfinə rəsmi nahar verilib.
Dövlət başçıları rəsmi naharda çıxış edib.