Azərbaycan prezidenti Ramzan Kadırovu qəbul edib - FOTO

Lent.az-ın AzərTAc-a istinadən verdiyi məlumata görə, ölkə başçısı ölkəmizlə Rusiya Federasiyasının ayrı-ayrı subyektləri arasında əməkdaşlıq əlaqələrinin gücləndirilməsinin Azərbaycanla Rusiya Federasiyası arasında ikitərəfli münasibətlərin daha da möhkəmləndirilməsi işinə töhfə verəcəyinə əminliyini ifadə edib. Prezident İlham Əliyev Rusiya Federasiyası Çeçenistan Respublikasının başçısı R. Kadırovun ikinci dəfə ölkəmizə səfər etməsini xalqlarımız arasında mövcud olan dostluq və qardaşlıq münasibətlərinin yaxşı göstəricisi kimi dəyərləndirib. Prezident İlham Əliyev əməkdaşlığımızın iqtisadi, sərmayə qoyuluşu, humanitar və digər sahələrdə daha da genişləndirməyin önəmini qeyd edib. Çeçenistanda sabitliyin bərqərar olunduğunu və genişmiqyaslı layihələrin həyata keçirildiyini vurğulayan dövlət başçısı əldə olunan uğurlar münasibətilə onu təbrik edib.
Çeçen xalqının Azərbaycan xalqını özünə qardaş və dost xalq hesab etdiyini deyən R. Kadırov xalqlarımız arasında mövcud olan bu münasibətlərin qədim tarixi köklərə malik olduğunu vurğulayıb. O, Azərbaycanda gedən sürətli inkişaf proseslərinin böyük maraqla izlənildiyini deyib.
Qeyd edək ki, bu gün Prezident İlham Əliyevin adından Rusiya Federasiyası Çeçenistan Respublikasının başçısı R. Kadırovun şərəfinə nahar verilib.