Rusiyanın Azərbaycanlı Gənclər İttifaqı: “Yarımçıq qalmış mahnı”nı boykot edin!

Lent.az-ın AzərTAc-a istinadən məlumatına görə, Rusiyanın Azərbaycanlı Gənclər İttifaqı Azərbaycan diasporuna ünvanlanmış bəyanatla çıxış edib.

Bəyanatda xəbərdarlıq edilir ki, ermənilərin çəkdiyi “Yarımçıq qalmış mahnı” kinofilmi təhrikçilikdir və bu təhrikə uymaq lazım deyildir.

Sənəddə deyilir:“Rusiyanın Azərbaycanlı Gənclər İttifaqı Azərbaycan diasporunu ermənilərin çəkdiyi şovinist ruhlu, iki gün bundan əvvəl premyerası olmuş “Yarımçıq qalmış mahnı” filmini boykot etməyə çağırır.

İttifaqın nümayəndələri filmin nümayişində iştirak etmişlər və bu təhrikçi lenti hələ görməyən adamlara bildirir ki,şovnizm ideyası qanına-canına hopmuş erməni müəlliflər Azərbaycan əsgərini qaniçən işğalçı, erməni əsgərini isə “vətənini müdafiə edən» ən nəcib bir insan kimi təqdim edərək, sətiraltı formada anti -Azərbaycan təbliğatı aparırlar.

Bununla belə onlar öz işlərini “sülhyaratma” kimi qələmə verirlər. Bu iyrənc filmin prodüseri Qoar Gevorqyanın mövqeyi nifrət doğurur. O, premyerada həyasızcasına demişdir ki, ermənilər sülh bağlamağa yalnız Azərbaycan Dağlıq Qarabağın və ona bitişik torpaqların müstəqilliyini tanıyandan sonra hazırdırlar.

Budur, “xalqlar arasında qərəzsiz dialoq” adı ilə zalları ermənilər və azərbaycanlılarla dolduraraq, bu yolla pul qazanan ermənisayaq “sülhyaratma”. Bu təhrikçi film bütün azərbaycanlılar tərəfindən boykot edilməlidir”.