Birinci xanım Fransada-

Parisdə Azərbaycanla Fransa arasında diplomatik əlaqələrin qurulmasının 20 illiyinə həsr olunmuş təntənəli mərasim keçirilib.

APA-nın “Azərtac”a istinadən verdiyi xəbərə görə, Heydər Əliyev Fondunun təşəbbüsü və Azərbaycanın Fransadakı səfirliyinin dəstəyi ilə keçirilən mərasimdə Azərbaycanın birinci xanımı Mehriban Əliyeva iştirak edib.

M. Əliyeva mərasimdə çıxış edərək, 1991-ci ildə müstəqilliyini bərpa edən ölkəmizin keçdiyi inkişaf yolundan danışıb: “Bu gün Azərbaycan dünya xəritəsində layiqli yerini tutub və sürətlə inkişaf edir.

Birinci xanım müstəqillik dövründə Fransa-Azərbaycan əlaqələrinin hərtərəfli inkişaf etdiyini bildirib: “Siyasi əlaqələrimiz çox yüksək səviyyədədir. Bu ilin sentyabr ayında Azərbaycanın və Fransanın dövlət başçılarının görüşü bu münasibətlərin strateji xarakterini bir daha təsdiqlədi. Biz beynəlxalq arenada qarşılıqlı anlaşma əsasında əməkdaşlıq edirik. Ötən il ölkəmizin BMT Təhlükəsizlik Şurasına üzv seçilməsi bu əlaqələri tamamilə yeni yüksək səviyyəyə çıxardı”.

Ermənistan-Azərbaycan, Dağlıq Qarabağ münaqişəsinə toxunan M. Əliyeva münaqişənin həllinin Azərbaycan-Fransa gündəliyində üstünlük təşkil etdiyini vurğulayıb: “Ölkələrimiz arasında iqtisadi əlaqələr də sürətlə inkişaf edir. Qarşılıqlı ticarət dövriyyəsi 4 milyard avroya yaxınlaşıb və bu gün Azərbaycanda 30-dan çox fransız şirkəti fəaliyyət göstərir”.

Fransa Senatının Fransa-Qafqaz dostluq qrupunun sədri, senator Ambruaz Düpon mərasimdəki çıxışında bildirib ki, ölkələrimizin ikitərəfli əlaqələri 20 ildə böyük inkişaf yolu keçib.

A.Dupon hazırda Fransa-Qafqaz dostluq qrupuna 30 senatorun daxil olduğunu deyib.

Fransalı senator Heydər Əliyev Fondunun prezidenti M. Əliyevanın mədəniyyət sahəsində əlaqələrin inkişafına verdiyi töhfələri və Milli Məclisdə Fransa-Azərbaycan parlamentlərarası dostluq qrupunun üzvü kimi fəaliyyətini də yüksək qiymətləndirib.

Tədbirdə Üzeyir Hacıbəyli adına Azərbaycan Dövlət simfonik orkestri və Fransanın Kolonn orkestri əməkdar artist Fəxrəddin Kərimovun dirijorluğu ilə Azərbaycan və Fransa bəstəkarlarının əsərlərini ifa edib.

Konsertdə Fransanın dövlət və hökumət rəsmiləri, tanınmış ictimai-siyasi və mədəniyyət xadimləri, ictimaiyyətin nümayəndələri iştirak ediblər.