Əli Əhmədov: “Xankəndi hava limanı texniki parametrlərə uyğun deyil”

Lent.az-ın məlumatına görə, bunu yap.org.az saytına açıqlamasında Yeni Azərbaycan Partiyasının sədr müavini, millət vəkili Əli Əhmədov bildirib. Ə. Əhmədov vurğulayıb ki, Xankəndi hava limanının fəaliyyət göstərməsi imkanları lazım olan texniki parametrlərə uyğun deyil: “Digər tərəfdən, başqa ölkələrin Xankəndi ilə hər hansı əlaqəsi yoxdur ki, buradan uçuşlar həyata keçirilsin. Yerevandan savayı həmin əraziyə haradansa uçuşların olması mümkün deyil”.

Ermənistanın və separatçı, qondarma Dağlıq Qarabağ rejiminin Xankəndi hava limanı ilə bağlı avantürist açıqlamalarına münasibət bildirən YAP rəsmisi ermənilərin belə hərəkətlərinin münaqişənin nizamlanması istiqamətində gedən danışıqlara zərbə vurduğunu söyləyib: “Digər tərəfdən beynəlxalq öhdəliklərin və müvafiq qanunların ciddi şəkildə pozulması ilə müşayiət olunan belə hərəkətlər həm Ermənistanın provokasiya xarakterli hərəkətlərini nümayiş etdirir, həm də Dağlıq Qarabağ münaqişəsinin nizamlanması istiqamətində aparılan danışıqlar prosesinə zərbə vurur. Azərbaycanın istər bu məsələdə, istərsə də Dağlıq Qarabağ münaqişəsi ilə bağlı mövqeyi ədalətə və beynəlxalq hüquqa söykənir”.