Çiyələyi öz pürəsi ilə necə dondurmaq olar?

Yayın əvvəli çiyələk mövsümünün ən məhsuldar dövrüdür. Bu vaxt hər kəs bu ətirli və dadlı giləmeyvənin ləzzətini növbəti mövsümə qədər qoruyub saxlamaq istəyir. Mütəxəssislər bildirirlər ki, çiyələyin uzun müddət keyfiyyətini itirmədən saxlanılması üçün ilk növbədə onu düzgün hazırlamaq lazımdır.

Lent.az xəbər verir ki, ççiyələyi yaxşıca yuyun və tam qurumasını gözləyin. Yalnız bundan sonra yaşıl saplaqlarını təmizləyin. Bu qayda vacibdir, çünki saplaqları əvvəlcədən qoparıldıqda giləmeyvə artıq su çəkə bilər. Əgər çiyələyin saplaqları əvvəlcədən təmizlənibsə, onu mümkün qədər tez yuyub dərhal qurulamaq tövsiyə olunur. Təcrübəli evdar xanımlar emal üçün nəzərdə tutulan çiyələkləri yığmazdan iki gün əvvəl sahəni sulamamağı da məsləhət görürlər. Meyvənin tərkibində təbii nəmlik nə qədər az olarsa, dondurulduqdan sonra da keyfiyyətini bir o qədər yaxşı qoruyar. İri, sağlam və gözəl görünən çiyələkləri bütöv saxlamaq, xırda, formasını itirmiş və ya bir qədər yetişməmiş giləmeyvələri isə püre hazırlamaq üçün istifadə etmək daha məqsədəuyğundur.

Çiyələyi öz püresi ilə necə dondurmaq olar?

Bu üsul qışda demək olar ki, təzə çiyələk dadını qorumağa imkan verir. Bunun üçün 1 kiloqram çiyələk püresinə 300 qram şəkər tozu əlavə edib yaxşıca qarışdırın. Şəkər yalnız dad vermir, həm də məhsulun aşağı temperaturda daha yaxşı saxlanmasına kömək edir. Daha sonra bütöv təmizlənmiş çiyələkləri kip bağlanan zip paketlərə və ya plastik qablara düzün. Hazırladığınız şirin çiyələk püresini onların üzərinə tökün. Pürənin bütün giləmeyvələri tam örtməsinə diqqət edin. Sonra paketlərin içindəki artıq havanı ehtiyatla çıxarın, onları möhkəm bağlayın və dondurucuya yerləşdirin.

Ən vacib məqam düzgün əridilməsi

Bu üsulun əsas sirri çiyələyi düzgün əridə bilməkdir. Mütəxəssislər bildirirlər ki, dondurulmuş çiyələyi otaq temperaturunda, suda və ya mikrodalğalı sobada əritmək olmaz. Ən yaxşı üsul onu axşamdan soyuducunun rəfinə qoymaq və gecə ərzində təbii şəkildə əriməsini gözləməkdir. Belə olduqda çiyələklər formasını, möhkəmliyini və təzə dadını maksimum dərəcədə qoruyub saxlayır.