Fərhad Bədəlbəyli: “O olmasaydı..."

18 sentyabr - Milli Musiqi Günü münasibətilə keçirilən silsilə tədbirlər Üzeyir Hacıbəyli adına Bakı Musiqi Akademiyasının qarşısında davam etdirilib. Lent.az-ın məlumatına görə, mərasimdə Dövlət Xor Kapellası, Müdafiə Nazirliyinin Nümunəvi Hərbi Orkestri Ü. Hacıbəyovun əsərlərini səsləndirib.

Mədəniyyət və turizm nazirinin müavini Ədalət Vəliyev Üzeyir Hacıbəylinin doğum gününün Azərbaycan xalqı üçün musiqi bayramına çevrildiyini bildirib. Nazir müavini çıxışında onu da qeyd edib ki, bizim musiqimiz nəinki Azərbaycanda, hətta bütün dünyada zəngin Azərbaycan mədəniyyətini təmsil edir: “Azərbaycan musiqisi böyük inkişaf yolu keçib və böyük ənənələr bu gün də davam etməkdədir. Builki musiqi bayramında dünyanın müxtəlif ölkələrindən ən məşhur musiqiçilər, musiqi kollektivləri iştirak edirlər və qarşıdakı günlərdə siz onların konsertlərini dinləyə biləcəksiniz. Bu böyük musiqi bayramı münasibətilə hamını təbrik edirəm”.

Bakı Musiqi Akademiyasının rektoru, xalq artisti Fərhad Bədəlbəyli Üzeyir bəyin həyat və yaradıcılıq yolundan danışıb: “Biz hamımız fəxr etməliyik ki, Üzeyir bəy kimi şəxsiyyətimiz var. O olmasaydı, Azərbaycanda nə opera, simfonik musiqi olmayacaqdı. Hamınızı təbrik edirəm, inanıram ki, Üzeyir bəyin musiqisi bütün dövrlərdə seviləcək, ifa olunacaq və yaşayacaq”.