Şekspir haqqında məktub tapıldı: yeni FAKTLAR...

Böyük Britaniyada edilən gözlənilməz bir kəşf Uilyam Şekspirin şəxsi həyatına yeni işıq salıb.

Lent.az xarici mediaya istinadən xəbər verir ki, Herford Kilsə Kitabxanasında tapılan XVII əsrə aid məktub fraqmenti, dahi dramaturqun Enn Hetuey ilə evliliyi haqqında köklü təsəvvürləri dəyişə bilər.

Fraqment hələ 1978-ci ildə aşkar olunub, lakin yalnız son zamanlar Bristols Universitetinin professoru Metyu Steql onu tam deşifrə edə bilib. Alimin fikrincə, məktub məhz Uilyam Şekspirin həyat yoldaşı Enn Şekspirə ünvanlanıb.

Sənəddə Enn Şekspirdən ərinin bir yetim üçün anasının xahişi ilə saxladığı pulları geri qaytarmaq istənilir. Məktubda cütlüyün yeni ünvanı - Londonda Triniti Leyn küçəsi də qeyd olunub.

Bu fakt böyük sürpriz olub, çünki uzun müddət Enn Hetueyin bütün həyatını Stratford-upon-Avondakı kənd evində keçirdiyi hesab olunurdu. Məktub isə onun əri ilə birlikdə Londonda yaşayıb və maliyyə məsələlərini birgə idarə etdiklərini göstərir.

Məktub müəllifi "Xanım Şekspir"ə müraciət edərək onun maliyyə vəsaitlərinə çıxışının və ərinə təsir imkanlarının olduğunu vurğulayır, amma xahiş edir ki, şəxsi işlərinə qarışmasın - bu isə Enn Hetueyin müstəqil və aktiv həyat mövqeyinə işarə edir.

Məktub Alman ilahiyyatçısı İohann Piskatorun 1608-ci ildə Richard Field tərəfindən nəşr olunmuş "Bibliya mətnlərinin təhlili" kitabının cildində qorunub saxlanılıb. Qeyd edək ki, Richard Field Stratforddan Şekspirin qonşusu olub və onun əsərlərinin ilk nəşrini çap edib.

Daha əvvəl isə Uilyam Şekspirin ilk çap olunmuş pyes toplusu olan "Birinci Folio" əsərinin orijinal nüsxəsinin Nyu-Yorkdakı “Christie's” hərracında rekord məbləğə satıldığı bildirilib.