Paolo Sorrentino böyük ekranlara “Bəxşiş” (“Blagodet”) filmi ilə qayıdır – bu, uydurma italyan prezidenti Mariano De Santisin və onun sirrlərinin hekayəsidir.
Lent.az xarici mediaya istinadla real liderlər haqqında çəkilmiş beş kult filmi təqdim edir. Çörçill və Tetçerdən tutmuş Tramp və Berluskoniyə qədər – və böyük siyasətin parlaq fasadının arxasında əslində nələrin gizləndiyini göstərir.
“Qaranlıq zamanlar” (2017)
Co Rayt “Qürur və qərəz” və “Kəffarə” kimi sırf ingilis ruhlu filmlərlə ad qazanıb. Buna görə də ölkəsinin ən böyük siyasətçilərindən biri olan Uinston Çörçill haqqında bədii film çəkmək ideyası olduqca məntiqli görünür. Film bizi İkinci Dünya müharibəsi dövrünə aparır və Çörçillin Böyük Britaniyanın baş naziri postundakı ilk günlərini, eləcə də müttəfiqlərin gələcək qələbəsinə verdiyi böyük töhfəni göstərir.
Ekran əsəri 6 “Oskar” nominasiyası alıb və iki mükafata layiq görülüb: “Ən yaxşı qrim və saç düzümü” və “Ən yaxşı kişi rolu”. Sonuncu mükafatı isə inanılmaz transformasiyasına görə Qari Oldman qazanıb.
“Dəmir ledi” (2011)
Fillida Lloydun filmografiyasında iki əsas layihə var: günəşli və yüngül “Mamma Mia!” müzikli və Böyük Britaniyanın ilk qadın baş naziri, sərtliyi və uzun müddət hakimiyyətdə qalması ilə tanınan Marqaret Tetçer haqqında ciddi bioqrafik film. Tetçerin özünə film çox da xoş gəlməsə də, kino tənqidçiləri və tamaşaçılar ekran işini böyük həvəslə qarşılamışdı. Ən çox tərif isə əfsanəvi Meril Stripə ünvanlanmışdı – bu rol ona “Oskar”, “Qızıl Qlobus” və BAFTA mükafatlarını qazandırdı.
“Şagird. Trampın hekayəsi” (2024)
Donald Trampın qalmaqallı fiquru tez-tez qızğın müzakirələrə səbəb olur. Bir neçə il əvvəl, prezident seçkiləri ərəfəsində istedadlı iran-danimarkalı rejissor Əli Abbasi (işlərində sosial ədalətsizlik mövzusunu tez-tez araşdırır) gələcək siyasətçinin şəxsiyyətini və formalaşma tarixini analiz edən xəbərdarlıq xarakterli film çəkib.
Televiziya xronikasına bənzər üslubda hazırlanmış bu film gənc Trampın vəkil Roy Konla münasibətlərinə fokuslanır. Roy Kon onun üçün bir növ mentor rolunu oynayır.
Şəxsiyyətin ziddiyyətli tərəflərini anlamağa çalışmaqla yanaşı, film Sebastyan Sten və Ceremi Stronqun möhtəşəm aktyor oyunu ilə də seçilir – onların performansları “Oskar” nominasiyalarına layiq görülüb.
“Silvio və digərləri” (2018)
Paolo Sorrentino üçün “Bəxşiş” siyasət mövzusuna həsr olunan ilk film deyil. O, 2008-ci ildə italyan baş naziri Culio Andreotti haqqında “Möhtəşəm” (“Il Divo”) filmini çəkmişdi. 2018-ci ildə isə növbə müasir İtaliya siyasətinin ən qalmaqallı və ziddiyyətli fiqurlarından biri olan Silvio Berluskoniyə çatdı. Müxtəlif tərəflərdən baxış təqdim edən film Berluskoninin çoxşaxəli obrazını yaratmağa çalışır. Burada dəbdəbə və azğınlıqla dolu çılğın məclislər, 30 il sahib olduğu “Milan” futbol klubunun maraqlı idarəçiliyi, pərdəarxası intriqalar və nüfuzlu siyasətçi ilə tanışlıqdan fayda götürmək istəyən insanların bitməyən cəhdləri göstərilir.
“Bəxşiş” (2025)
Yuxarıda qeyd olunan filmlərdən fərqli olaraq, bu ekran işi real deyil, uydurma prezidentin hekayəsini tamaşaçıya təqdim edir. Mariano De Santis kollektiv və bəlkə də bir qədər idealizə olunmuş obrazdır, çünki müasir reallıqda bu qədər məsuliyyətli və ədalətli siyasətçiləri tapmaq olduqca çətindir. Filmdə onun prezidentlik müddətinin son ayları göstərilir. Bu dövr hələ də çətin seçimlərlə doludur və böyük məsuliyyət yükü ilə ağırlaşır. Qəhrəman qarşısında qalan üç qərarın hər birini diqqətlə ölçüb-biçir, eyni zamanda onu artıq 40 ildən çoxdur narahat edən köhnə bir sirri açmağa çalışır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
