Bakı Musiqi Akademiyasının professorları Norveçə gedəcəklər

Bakı Musiqi Akademiyası ilə Norveçin Bergen Universiteti nəzdində yerləşən “Qriq” Akademiyası arasında bağlanan müqavilə çərçivəsində BMA-nın bir qrup professor-müəllim heyəti yaxın günlərdə sözü gedən ölkəyə səfər edəcək. Bəstəkarlar İttifaqından Lent.az-a verilən xəbərə görə, Bergen Universitetinin “Qriq” Akademiyası ilə Bakı Musiqi Akademiyası arasında 5 ildən artıqdır ki, əməkdaşlıq münasibətləri mövcuddur.

Bakı Musiqi Akademiyasının xarici məsələlər üzrə prorektoru Yeganə Axundova bildirib ki, bu əməkdaşlıq çərçivəsində bir çox layihələrin keçirilməsi nəzərdə tutulub. Belə ki, 2008-ci ildə bir qrup Norveç musiqiçisi ölkəmizdə səfərdə olub. Səfər çərçivəsində Norveçli qonaqlar konsert proqramı ilə çıxış edib, bir sıra görüşlər keçiriblər: “Bakı Musiqi Akademiyası ilə yuxarıda adlarını sadaladığımız təhsil müəssisələri arasında birgə əməkdaşlıq, konsertlər, konfransların keçirilməsi, tələbə-müəllim mübadiləsi barədə müqavilələr də imzalanıb. Bu müqavilə çərçivəsində 2009-cu ildən bu günədək müxtəlif pillələrdə 6 tələbəmiz Berqen Universitetində təhsil almağa göndərilib. 2011-ci ildə isə “Avroasiya” layihəsi çərçivəsində professor-müəllim mübadiləsinə başlanılıb”.

Bakı Musiqi Akademiyasının rektoru SSRİ xalq artisti Fərhad Bədəlbəyli, respublikanın xalq artistləri BMA-nın prorektoru Yeganə Axundova, BMA-nın professoru , skripkaçı Zəhra Quliyeva, professor Yalçın Adıgözəlzadə, həmçinin BMA-nın Beynəlxalq layihələr üzrə koordinatoru Aytən Cəlilovanın Norveçə nəzərdə tutulan səfərləri bu məqsədlə həyata keçiriləcək.

Jalə