Dinləmək üçün hansı qulağa pıçıldamaq - beynin xüsusiyyətləri haqqında gözlənilməz kəşf

İsveçrənin Lozanna Federal Texnologiya İnstitutunun nevroloqları məlumatı necə eşitdiyimizlə bağlı qəribə, lakin maraqlı fakt aşkar ediblər.

Lent.az xarici KİV-ə istinadən xəbər verir ki, sol qulaqdan gələn xoş məlumat daha güclü reaksiyaya səbəb olur.

İnsanlar onu dinləməyə daha həvəslidirlər. Alimlər 13 nəfərin iştirakı ilə eksperiment aparıblar, beyin skanları zamanı tədqiqatçılar qeyd ediblər ki, yüngül gülüş kimi xoş səslər sol tərəfdən eşidildikdə beynin eşitmə sistemində sinir fəaliyyətinin güclənməsinə səbəb olur. Bu, insanın eşitmə qabığının təkcə səsin intonasiyası və yüksəkliyi ilə deyil, həm də istiqaməti ilə idarə olunduğunu göstərir.

Hazırda alimlər bunun niyə baş verdiyini anlamırlar. Buna görə də onlar artıq bu mexanizmi aydınlaşdırmağa kömək edəcək yeni tədqiqatlar üçün hazırlıqlara başlayıblar.

Qeyd edək ki, bu, insanların məlumatı sol və sağ qulaqlarında fərqli şəkildə qəbul etdiyini göstərən ilk araşdırma deyil. Əvvəlki araşdırmalar göstərib ki, sol qulaq səsdə duyğuları daha yaxşı aşkarlayır. Bu, eşitmə qabığının sağ yarımkürəsinə məlumat ötürməsi ilə bağlıdır.

Eyni zamanda, İsveçrə alimlərinin tapıntıları bir qədər fərqli məlumatları göstərib: tədqiqat iştirakçıları üç fərqli istiqamətdə xoşbəxt insan səslərini dinlədikdə, onların eşitmə qabığının hər iki tərəfi aktivləşib. Ancaq yalnız sol tərəfdə dinlənilən qeydlər daha güclü nevroloji reaksiyaya səbəb olub.