Sevdanın gecə-gündüz çalışmasına səbəb nədir?

Müğənni Sevda Yahyayeva avqust ayında konsert vermək niyyətindədir. Bu barədə Lent.az-a ifaçının özü məlumat verib. O, bildirib ki, artıq konsertin hazırlıqlarına başlayıb: “Konsert üçün gecə-gündüz çalışıram. Özümü xoşbəxt müğənni hesab edirəm ki, neçə illərdir, məni sevən insanların qarşısında solo konsertlərimlə çıxış edirəm. İndi hazırlaşıram ki, daha maraqlı və fərqli konsert proqramı ilə çıxış edim. Sevilən bəstəkarımız İsmayıl Əsədovun topladığı musiqi orkestrı ilə birlikdə canlı musiqi səsləndiriləcək. Səhnədə mənimlə birlikdə rəqqaslar da çıxış edəcək. Bu il də ənənəyə sadiq qalaraq 20-dən çox mahnı oxuyacağam. Odur ki, gecə-gündüz komanda şəklində çalışıram ki, tamaşaçı razı qalsın. Geyimlərim daima fərqli olub. Bu il də fərqli və yeni səhnə geyimlərində çıxış edəcəəm. Konsert haqda ümumi detalları açıqlamaq istəmirəm. İnanıram ki, konsertə gələnlər zamanını əyləncəli, musiqili və maraqlı keçirəcək”.