Rəqsanə məhkəmədən danışdı: "Anam kişi kimi qız doğub"

Müğənni Rəqsanə İsmayılova ilə müğənni Əli Mirəliyev arasında olan qalmaqal səngimək bilmir. Lent.az-ın məlumatına görə, “ATV"nin “Gün üzü” verilişinə qonaq olan R.İsmayılova Ə.Mirəliyevi məhkəməyə verməsindən danışıb. O bildirib ki, həmkarı ondan bağışlanmasını istəsə də, o, bu təklifi rədd edib: “Ailədə tərbiyə almışam. Özümdən böyüklərə qarşı heç bir zaman hörmətsizlik etmərəm. Hətta baxsam ki, o insan mənə qarşı səhv edir, mən susaram. Amma görəndə ki, məndən yaşca böyük insan dəfələrlə mənə qarşı hörmətsizlik edir, məcbursan ki, nəsə bir tədbir görəsən. Ümumiyyətlə o insan barəsində danışmaq istəmirəm. Onu verdim məhkəməyə və nəticədə qalib gəldim. Sonra da çıxıb efirdə üzr istədi. Amma mən bu üzrü qəbul etmədim. Ona görə qəbul etmədim ki, səhvi edən insan deyir ki, “Mən nə etmişəm ki? Oxuya bilmir”. Sənin nəyinə lazımdır? Mən Azərbaycanda olmayan vaxt anam efirə baxıb, görüb ki, həmin insan barəmdə yenə həmin ifadələri işlədir. Anamın da rəfiqələri var. Onlar da anama deyir ki, “Rəqsanə hamının cavabını verir. Heç bir şeydən qorxan deyil. Bəs niyə onun cavabını vermir?” Anam da mənə zəng edib, telefonda ağlayıb, deyir ki, “ay bala, sən kişi kimi qadınsan, niyə bunun cavabını vermirsən? Bu çıxıb hər yerdə səndən danışır”. Anama görə onu məhkəməyə verdim. Anam kiməsə görə niyə utanmalıdır ki? Anam kişi kimi qız dünyaya gətirib, maşallah, bütün Azərbaycan sevir”.