Nazpəri Dostəliyeva: “Heç vaxt İlhaməyə zəng etməmişəm”

Azərbaycanın xalq artisti Nazpəri Dostəliyeva həmkarı İlhamə Quliyevanın ATV telekanalındakı “Ümid var” verilişində onun haqda səsləndirdiyi fikirlərə sərt reaksiya verib. Nazpəri Dostəliyevanın məsələ ilə bağlı Lent.az-a verdiyi açıqlamanı olduğu kimi təqdim edirik:

“ATV telekanalının “Ümid var” verilişinin ayın 20-də canlı yayımda efirə gedən buraxılışında baş verənlərdən çox təəssüf hissi keçirirəm. Təəssüf edirəm ki, mən də telefon vasitəsi ilə olsa da həmin verilişi şərəfləndirdim. Çünki orada baş verənlər nə mentalitetimizə, nə də KİV-də yayımlamağa, yumşaq dildə desək, layiq olanlardır.

Əvvəla, bir məsələyə aydınlıq gətirim ki, mən heç vaxt İlhaməyə zəng etməmişəm, heç belə niyyətim də olmayıb. Əvvəllər də qeyd etdiyim kimi, mən, ümumiyyətlə, onun telefon nömrəsini bilmirdim, çünki mənə lazım da deyildi.

Ancaq son günlər, xüsusi ilə son bir həftə ərzində İlhamənin canlı efirdən özünün mətbuat katibi və köməkçisi kimi adlarını çəkdiyi şəxslər (bu da onun növbəti yalanıdır, əksini isbat etmək üçün əmək müqavilələrini təqdim etsin) və verilişin aparıcısı Zaur Baxşəliyev öz mobil telefonlarından dəfələrlə mənə zəng edib, İlhamə ilə barışmağımı xahiş ediblər. Mən də həmin şəxslərə etirazımı bildirmişəm. Bundan sonra İlhamə özü mənə zəng edib üzrxahlıq edərək anasının ildönümünə dəvət edib. Lazım gələrsə, mobil operatorlardan kimin kimə zəng etdiyini müəyyənləşdirmək olar.

Daha sonra Zaur Baxşəliyev məni canlı efirdə iştiraka dəvət etsə də, mən məlum səbəblərdən dünən verilişdə iştirakdan imtina etdim. Ancaq Zaura bildirdim ki, əgər İlhamə canlı efirdə məndən üzr istəsə, onun günahlarını bağışlayaram. İndi də başa düşürəm ki, düz eləmişəm ki, canlı efirdə iştirak etməmişəm. Çünki orada baş verənlərə, İlhamənin dəfələrlə həm fikrini dəyişməsinə, həm də işlətdiyi jarqon ifadələrə Ağacəbrayıl kimi bir sənətkarın və şəxsiyyətin sözünü kobudcasına kəsməsi, aparıcının qeyri-səmimiliyinə dözmək asan məsələ deyil.

Bundan başqa, həm İlhamənin, həm də onun vəkilinin (bu, xüsusilə vəkil üçün acınacaqlı və gülüncdür) mənim şəxsi həyatıma növbəti dəfə müdaxilə etmələri də bağışlanmazdır. Aparıcı isə hər vasitələrlə bunlara şərait yaratmaqla öz əsl simasını göstərdi.

Hesab edirəm ki, bu cür hallar nə bizlərə, nə KİV-ə, nə də ümumiyyətlə, xalqımıza və dövlətimizə başucalığı gətirmir. Hamını əmin edirəm ki, günahkar şəxslərin hər biri öz layiq olduqlarına çatacaqlar”.