Müslüm Maqomayev anıldı - YENİLƏNİB

Bu gün Azərbaycan və SSRİ xalq artisti Müslüm Maqomayev vəfatının beşinci ildönümü münasibətilə Fəxri Xiyabanda yad edilib. Lent. az-ın məlumatına görə, bu münasibətlə sənətkarın yaxınları, sənət dostları, hökumət və dövlət rəsmiləri onun məzarını ziyarətə gəliblər. Mədəniyyət və Turizm Naziri Əbülfəs Qarayev bildirib ki, Azərbaycan dövləti və xalqı Müslüm Maqomayevin xatirəsini həmişə əziz tutub: “Biz artıq beş ildir bu böyük musiqiçini və böyük insanı itirmişik. Azərbaycan dövləti və xalqımız onun xatirəsini həmişə ehtiramla anıb. Müslüm Maqomayevin adına Bakıda musiqi məktəbi var, Moskvada böyük heykəli ucaldılıb. O, Azərbaycan mədəniyyətini yaşadan, ucaldan insan idi. Onun adı, xatirəsi həmişə bizim qəlbimizdə olacaq”

“Müslümlə həmişə telefonda danışanda deyirdi ki, Azərbaycanla bağlı hər şeyi çox diqqətlə izləyirəm. O, ürəyiaçıq, əliaçıq, çox istedadlı və vətənini sevən insan idi. Müslüm dəmir adamıydı. Sənətindən də kral kimi getdi”. Bu sözləri Azərbaycan Rəssamlar Birliyinin sədri, xalq rəssamı Fərhad Xəlilov deyib.

Eldar Quliyev və Ramiz Quliyev onu Azərbaycanın böyük vətəndaşı və sənətkarı kimi dəyərləndiriblər.

Qeyd edək ki, M. Maqomayev 1942-ci ildə Bakıda doğulub. Uzun müddət Moskvada yaşayan müğənni 2008-ci il oktyabrın 25-də vəfat edib.