Elşad Xose azadlıqda: "Oksana şikayət ərizəsini..."-RƏSMİ AÇIQLAMA

Məşhur reper Elşad Xose sərbəst buraxılıb. Məlumatı Lent.az-a Daxili İşlər Nazirliyinin mətbuat xidmətinin rəis müavini Orxan Mansurzadə təsdiqləyib.

Bəzi mətbuat orqanlarında Oksana Rəsulovanın Elşad Xosedən rəsmən şikayət etmədiyi və ümumiyyətlə, sözügedən mövzudan xəbərsiz olduğu bildirilmişdi. Lakin O. Mansurzadə bildirib ki, bu haqda polisə O. Rəsulova tərəfindən rəsmi şikayət ərizəsi daxil olub. Şikayətçi ərizəsini geri götürməyib, şikayət hazırda qüvvədədir.

Həmçinin, DİN-nin rəsmisi qeyd edib ki, Xosenin ifadəsi alındıqdan sonra sərbəst buraxılsa da, istintaq davam edir.

Qeyd edək ki, reperin keçmiş həyat yoldaşı Oksana Rəsulova Xose tərəfindən xuliqanlıq zəminində döyüldüyünü və bıçaqla hədələndiyini deyib.

Faktla bağlı Binəqədi rayon Polis İdarəsinin istintaq şöbəsində Cinayət Məcəlləsinin 221.1-ci (xuliqanlıq) maddəsi ilə cinayət işi başlanılıb.

* * *

11:54

Tanınmış reper Elşad Xosenin polis tərəfindən saxlanılması rəsmən təsdiqlənib.

Bu barədə KİV-də gedən məlumatlarla bağlı APA-nın sorğusunu cavablandıran Daxili İşlər Nazirliyinin mətbuat xidmətinin rəis müavini Orxan Mansurzadə qeyd edib ki, oktyabrın 27-də Bakı şəhər sakini Oksana Rəsulova Binəqədi rayon Polis İdarəsinin 5-ci Polis Bölməsinə ərizə ilə müraciət edərək həmin gün saat 01.00 radələrində yaşadığı evdə keçmiş həyat yoldaşı, əvvəllər məhkum olunmuş Elşad Əliyev (Elşad Xose) tərəfindən xuliqanlıq zəminində döyüldüyünü və bıçaqla hədələndiyini deyib.

Faktla bağlı Binəqədi rayon Polis İdarəsinin istintaq şöbəsində Cinayət Məcəlləsinin 221.1-ci (xuliqanlıq) maddəsi ilə cinayət işi başlanılıb, polis əməkdaşları tərəfindən təxirəsalınmaz tədbirlər həyata keçirilib və E. Əliyev saxlanılaraq istintaqa cəlb olunub.

İstintaq orqanı tərəfindən hər iki şəxsin ifadələri alınıb, müvafiq ekspertizalar təyin olunub.

Məhkəmə tibbi ekspertizası tərəfindən O. Rəsulovanın aldığı xəsarətin yüngül dərəcəli olduğu müəyyənləşib.

Hazırda faktla bağlı başlanmış cinayət işi üzrə zəruri istintaq hərəkətləri davam etdirilir.

11:17

Dünən keçmiş həyat yoldaşı Oksana Rəsulovanın şikayəti əsasında saxlanılan Elşad Əliyev (Xose) hazırda Binəqədi rayon Polis İdarəsindədir.

Lent.az-ın qafqazinfo-ya istinadən məlumatına görə, Binəqədi rayon Polis İdarəsindən Elşad Xosenin hazırda idarədə saxlanıldığı təsdiqlənib və bildirilib ki, reper gecəni orada keçirib. Bu gün izahatı alındıqdan sonra Xosenin sərbəst buraxılacağı gözlənilir.

Qeyd edək ki, Xosenin saxlanılmasına səbəb eks-xanımı Oksananın ondan şikayət edərək reper tərəfindən döyüldüyünü bildirməsidir.

Maraqlıdır ki, O. Rəsulova məlumatdan xəbərsiz olduğunu və belə bir hadisənin baş vermədiyini deyib.

Reperlə əlaqə yaratmaq mümkün olmayıb, onun telefonuna zəng çatmayıb.