Bəhram Bağırzadəyə Fransada mənzil bağışladılar

“Bakılı oğlanlar” Şən və Hazırcavablar Klubunun sabiq oyunçusu Bəhram Bağırzadə pərəstişkarları ilə özünəməxsus 1 aprel zarafatı edib. Lent.az-ın məlumatına görə, Bağırzadə məşhur fransalı rejissor Fransua Perrenin “Parisin ərəb məhəlləsi” filmində əlcəzairli qaçqın Lətif Həssən obrazını yaradıb.

O qeyd edib ki, çəkilişlər Fransa paytaxtında baş tutub və təqdimat sentyabrın 4-də Parisin “Grand Rex” kinoteatrında olacaq. Baş rolu ərəb dilində oynadığını deyən Bağırzadə çəkiliş meydançasında müasir Fransa aktyorları Sirill Tuvenen, Qrequar Lepress-Lenqe, Marion Kotiyyar və Odri Totu ilə tanış olduğunu vurğulayıb.

Aktyorumuzun son çəkiliş günü isə Novruz bayramı ilə üst-üstə düşüb. Bağırzadə həmin gün fransalı həmkarlarına əsl sürpriz bəxş edib. O, ənənəvi Avropa furşeti əvəzinə nəhəng Novruz tədbiri həyata keçirib. Qonaqlar Azərbaycanın dadlı şirniyyatları və qonaqpərvərliyindən məftun olublar. Çəkilişləri kurasiya edən Paris meriyasının mədəniyyət departamentinin direktoru Bağırzadənin aktyorluq bacarığını yüksək qiymətləndirərək, kurort şəhərinin mərkəzində ona kiçik, amma səliqəli mənzilin açarını təqdim edib.

Sonda tanınmış şoumen bunları da qeyd edib: “Əziz oxucular! Təqvimə baxmağı unutmayın. Bu, 1 aprel zarafatıdır. Böyük səmimiyyətlə: sizin Bəhram Bağırzadə”.