Aysel və Hadisə Bakıda eyni səhnəni paylaşacaqlar

Türkiyəni “Eurovision-2009” yarışmasında təmsil etmiş müğənni Hadisə Açıqgöz sabah ilk dəfə olaraq Bakıya gələcək.

APA-nın məlumatına görə, onu 15 nəfərdən ibarət nümayəndə heyəti müşayiət edəcək. Müğənni iyulun 10-da Yaşıl Teatr Konsert Kompleksində konsert verəcək. İyulun 12-də Bakıda qalacaq Hadisə paytaxtımızı da gəzmək niyyətindədir.

Bu konsertdə səhnəyə Azərbaycanı “Eurovision-2009” müsabiqəsində təmsil edən Aysel də çıxacaq. Aysel “Eurovision-2009“ müsabiqəsində ifa etdiyi “Always” mahnısını oxuyacaq. O, “Always”-i duet ortağı Araşsız ifa edəcək. Aysel Azərbaycan tamaşaçısı qarşısına “Eurovision-2009” səhnəsindəki geyimində çıxmaq fikrindədir. Aysel bildirib ki, Azərbaycanda bu müsabiqədən sonra ilk çıxışının yaddaqalan və unudulmaz olmasını istəyir. Elə bu səbəbdən də məhz həmin geyimdə və həmin mahnı ilə çıxış etmək arzusundadır.

Qeyd edək ki, iyulun 10-da Yaşıl Teatrda keçiriləcək konsertin biletlərinin qiyməti 20-150 manat arasındadır. Konsertin informasiya dəstəyi APA İnformasiya Agentliyinə məxsusdur.