Hökumət “qanuni oğru”nun başına yarım milyon PUL QOYDU

Artıq 4 ildir ki, kriminal lider “Saşa Şamaz”ın harada olduğunu hələ də tapa bilmirlər.

Rusiya Daxili İşlər Nazirliyi kriminal mühitin lideri olan Aleksandr Şamazovun harada olduğu barədə məlumat verənə yarım milyon rubl mükafat elan edib.

Lent.az xarici KİV-ə istinadən xəbər verir ki, bu barədə polisin regional idarəsinin mətbuat xidmətindən məlumat verilib.

Avtoritetə qarşı Rusiya Federasiyası Cinayət Məcəlləsinin 210.1-ci (“Cinayət iyerarxiyasında ən yüksək vəzifə tutma”) maddəsi ilə cinayət işi başlanıb. Qeyd edək ki, o, kriminal aləmdə “qanuni oğru” Saşa Şamaz kimi tanınır. Vaxtilə cinayətkar birlik təşkil etmək və digər cinayətlərə görə məsuliyyətə cəlb edilib. 2018-ci ildə Şamaz həbsdən çıxıb və rayonun kriminal mühitində aparıcı mövqe tutub.

“Saşa Şamaz”

Daxili İşlər Nazirliyi qanuni oğrunun tapılmasına kömək edən şəxslərin anonimliyinə zəmanət verir. Şamaz 2020-ci ilin avqustunda federal axtarışa verilib. Daxili İşlər Nazirliyinin məlumatına görə, o, cinayətə görə bölünmüş Kuzbass ərazilərinə nəzarətçilər təyin edib.

QEYD

Nəzarətçi qanuni oğru tərəfindən təyin edilmiş avtoritetdir. Həmin şəxs şəhərin müəyyən ərazilərində, düşərgələrdə - dəstələrdə, həbsxanalarda - kameralarda məsələləri həll etmək və vəziyyətə nəzarət etmək səlahiyyətinə malikdir.