Vergilər Nazirliyi işə qəbulla bağlı müsabiqə elan edib

Vergilər Nazirliyi vergi orqanlarında işə qəbulla bağlı müsabiqə elan edib. Bu barədə Lent.az-a nazirliyin analitik-informasiya şöbəsindən məlumat verilib.

Vergi orqanlarında işləmək istəyən şəxslər mayın 5-dən mayın 18-dək sənədlərini elektron qaydada nazirliyə təqdim etməlidir.

Müsabiqədə iştirak etmək istəyənlər bu müddət ərzində nazirliyin rəsmi internet səhifəsinə (www.taxes.gov.az və www.e-taxes.gov.az) daxil olaraq elektron ərizə formasını doldurmalıdırlar. Ərizə formasını sistemə daxil etdikdən sonra namizədə kod verilir. Namizəd sənədləri qəbul edildikdən üç iş günü ərzində verilmiş kod əsasında ərizəsinin qəbul edilib-edilmədiyi barədə məlumat ala bilər.

Sənədləri qəbul edilən namizədlər 30 maydan 1 iyuna qədər imtahana buraxılış vərəqələrini nazirliyin inzibati binasından götürməlidirlər. Müsabiqənin test imtahanı 3 iyunda Tələbə Qəbulu üzrə Dövlət Komissiyasının müəyyən etdiyi yerdə keçiriləcək.

Qeyd edək ki, müsabiqəyə Şamaxıda 2, Şirvanda 3, Lənkəranda 2, Beyləqanda 3, Qəbələdə 1, Yevlaxda 2, Zaqatalada 1, Şəmkirdə 2 və Gəncədə 1 yer olmaqla, ümumilikdə 17 vakant yer çıxarılıb. Boş yerlərin sayı müsabiqənin sonuna qədər dəyişə bilər.