Rövnəq Abdullayev “Petlim” şirkətin icraçı direktoru ilə görüşüb

Bu gün ARDNŞ prezidenti Rövnəq Abdullayev Hollandiyanın “APM Terminals” şirkətinin icraçı direktoru Kim Fayferin başçılıq etdiyi nümayəndə heyətini qəbul edib.

“APA-Economics”in ARDNŞ-a istinadən verdiyi məlumata görə, R.Abdullayev ölkədə həyata keçirilən irimiqyaslı enerji layihələr və logistika sahəsində görülən mühüm işlər barədə məlumat verib.

ARDNŞ prezidenti ötən ilin sonlarında müasir gəmiqayırma zavodunun istifadəyə verildiyini və Bakıda yeni dəniz limanının tikintisinin uğurla davam etdiyini qonaqların nəzərinə çatdırıb. Görüşdə qeyd edilib ki, ötən ilin fevralında imzalanmış sazişə əsasən, ARDNŞ-nin Türkiyədəki ən böyük aktivi olan “Petkim” Neft-Kimya Holdinqinə məxsus “Petlim” konteyner limanının idarəçiliyi bu sahədə liderlik edən “APM Terminals” şirkətinə həvalə olunub.

Əməkdaşlığın uğurla davam etdiyini söyləyən R.Abdullayev sazişin imzalanmasından qısa bir müddət sonra inşaat işlərinə başlandığını vurğulayıb və tikintinin uğurla başa çatdırılacağına əminliyini bildirib.

O, layihəni Türkiyə, Azərbaycan, Danimarka və Hollandiya arasında əməkdaşlığın mühüm hadisəsi adlandırıb, onun Türkiyə xarici ticarətinin inkişafında böyük rol oynayacağını, bu layihəyə qoyulan investisiya sayəsində Türkiyənin Əliağa və Nəmrud limanlar bölgəsinin dünyanın ən mühüm logistika mərkəzlərindən birinə çevriləcəyini qeyd edib.

“APM Terminals” şirkətinin icraçı direktoru Kim Fayfer Bakıya ilk dəfə səfər etdiyini deyib. O, İzmirdə həyata keçirilən uğurlu əməkdaşlığa görə ARDNŞ rəhbərliyinə təşəkkür edib, işlərin qrafikə uyğun davam etdiyini və layihənin müvəffəqiyyətlə nəticələnəcəyinə əmin olduğunu bildirib. Rəhbərlik etdiyi şirkət barədə məlumat verən qonaq “APM Terminals” şirkətinin və onun daxil olduğu “A.P.Moller-Maersk” qrupunun ARDNŞ ilə əməkdaşlığı genişləndirməyə maraq göstərdiyini söyləyib.

Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.