Neftin qiyməti 1 dollar ucuzlaşdı

Dünya bazarında neftin qiyməti yenidən ucuzlaşmağa başlayıb. APA TV-nin məlumatına görə, "Brent" markalı neftin bir bareli hazırda 40,52 dollardan satılır ki, bu da dünənki qiymətdən təxminən 1 dollar ucuzdur. Dünən qiyməti 40 dollara çatan Qərbi Texas nefti də xeyli ucuzlaşıb. Birjaların səhər seanslarında WTI neftinin bir bareli 39.01 dollardan satılıb. Ekspertlər bu gün Amerikanın neft ehtiyatlarına dair hesabatın açıqlanacağını xatırladır və ehtiyatların həcminin yenə də artacağına dair proqnozlar səsləndirirlər. Bu proqnozlar neftin qiymətinin orta hesabla 1 dollar ucuzlaşmasına təsir göstərib. Digər tərəfdən hesab olunur ki, OPEK üzvü olan və kartel daxil olmayan neft ölkələrinin Doxada keçiriləcək görüşünə qədər neftin qiyməti 40 dollar ətrafında sabitləşəcək. Qiymətlərə dair pessimist proqnozlardan biri isə neft sektoruna yatırılan sərmayənin geri çəkilməsi tendensiyasıdır. Əgər bu tendensiya güclənərsə, qiymətlərin 30 dollaradək ucuzlaşacağı istisna edilmir.