Bir neçə rayonda qaz olmayacaq

Bir neçə rayonun təbii qaz təchizatında məhdudiyyətlər olacaq. “Azəriqaz”-dan Lent.az-a verilən xəbərə görə, qaz ölçü qovşaqlarında görülən işlərlə əlaqədar bu gün saat 12.00-dək Yevlax rayonunun, saat 14.00-dək İsmayıllı rayonunun, saat 15.00-dək Xəzər rayonunun, saat 15.00-dan 17.00-dək isə Ağdaş rayonunun bir hissəsinə təbii qaz fasilələrlə veriləcək.

Kənd Əhmədli 2-ci Qəsəbə küçəsində qaz təchizatını yaxşılaşdırmaq məqsədi ilə istismara yararsız küçə qaz xətlərinin kəsilərək istismarda olan xətlərdən ayrılması ilə əlaqədar saat 11.00-dan 12.00-dək Xətai rayonunun bir hissəsinə təbii qazın verilişində məhdudiyyət olacaq.

Beyləqan rayonu ərazisində 329 evlik qaçqın qəsəbəsinin inşası ilə bağlı 200 mm-lik yeni çəkilmiş orta təzyiqli qaz xəttinin 905 p/m uzunluğunda hissəsinin qaz təchizatı mənbəyinə birləşdirilməsi ilə əlaqədar saat 17.00-dək Beyləqan rayonunun bir hissəsinə təbii qaz verilməyəcək.

Şamaxı şəhərinin M.Ə.Rəsulzadə, Ü.Hacıbəyov, Ə.Əlizadə, İstiqlal və A.Naseh küçələrində yaşayan istehlakçıların təhlükəsiz və fasiləsiz təbii qazla təmin edilməsi üçün orta təzyiqli qaz xətləri üzərində qaztənzimləyici qurğuların quraşdırılması, “Göyçay-1” və “Göyçay-2” QPS-lərin çıxışlarından qidalanan 159 mm-lik orta təzyilqi qaz xətlərində təmir işləri ilə əlaqədar saat 18.00-dək İmişli rayonuna, Binəqədi, Abşeron, Qobustan, Tovuz, Qazax, Şəmkir, Quba, Saatlı, Göyçay rayonlarının bir hissəsinə təbii qaz fasilələrlə veriləcək.

Yeni Suraxanı qəsəbəsini təbii qazla təmin edən 219 mm-lik orta təzyiqli qaz xətti üzərində olan siyirtmənin əvəzlənməsi, Nizami rayonu ərazisində aparılan təmir-bərpa işlərinin başa çatdırılması ilə bağlı Qara Qarayev prospektində yeni çəkilmiş 315 mm-lik polietilen orta təzyiqli qaz kəmərinin qaz təchizatı mənbəyinə birləşdirilməsi ilə əlaqədar işlər başa çatanadək Suraxanı və Nizami rayonlarının bir hissəsinə təbii qazın verilişində fasilələr yaranacaq.