“Trendyol” Azərbaycanda bağlanır? – İQTİSADÇIDAN AÇIQLAMA

Son günlər sosial şəbəkələrdə “Trendyol” platformasının bağlanması ilə bağlı məlumatlar yayılıb.

Maraqlıdır, görəsən bunun səbəbi nədir? “Trendyol” platforması ilə bağlı hansı tədbirlər görülə bilər?

Məsələ ilə bağlı iqtisadçı Eldəniz Əmirov Lent.az-a açıqlamasında bildirib ki, əgər “Trendyol” yerli şirkətləri üstələyirsə, onun sıxışdırılmasına yox, yerli şirkətlərin “Trendyol”a çatdırılmasına çalışmaq lazımdır.

Onun sözlərinə görə, bu səbəbdən “Trendyol”un təcrübəsini öyrənmək, elə şirkətə çevrilmək üçün hansı əngəllər varsa, bunu bəyan etmək və o əngəlləri aradan qaldırmaq daha doğru olardı:

“Əgər, “Trendyol” platforması hansısa formada Azərbaycanda müvafiq qanunvericiliyin tələblərini pozursa, onda bu zaman onu bu tələblərə əməl etməyə məcbur etmək mexanizmi olmalıdır. Həmçinin bu platforma Azərbaycandan böyük məbləğdə pulların çıxmasına səbəb olursa, yenə də bir başa qadağadan söhbət getməməlidir. Bu zaman statistik tərəzi düzəltmək lazımdır. Tərəzinin sol gözünə “Trendyol”un sayəsində Azərbaycandan çıxan valyutanı, digər gözünə isə 10 milyon vətəndaşın mənafeyini qoymaq lazımdır. Əgər, tərəzinin Azərbaycan vətəndaşların mənafeyi olan gözü ağır gələrsə, o zaman “Trendyol”un bağlanılması haqda düşünmək belə olmaz. O ki qaldı tərəzinin gözlərinə, tərəzinin sol gözündəki ağırlığı hesablamaq asandır. Avtomatlaşdırılmış sistem statistikanı verir. Amma əsas sağ gözdür. Vətəndaşın nələr qazandığını heç bir avtomat sistem hesablaya bilməz. Vətəndaş zaman, keyfiyyət, rahatlıq udur. Və ən əsası vətəndaş burda bir balasının şalvarına xərclədiyi pulla, iki, bəzən də üç balasına şalvar ala bilir. Bunun nəyi pisdir? Buna görə də qərar verməzdən əvvəl tərəzinin sağ gözünü dəqiq hesablamaq lazımdır. Yəni, bizdə keyfiyyətli ərzaqlıq buğda yetişmirsə, bunun günahı buğda idxal etdiyimiz Rusiyanın və ya Qazaxıstanın tarlalarında deyil. Bir tarlanı yandırmaqla, digərinin məhsuldarlığı artan deyil”.