BVF-in yeni “şef”i bəlli olur

Lent.az “dünyabulteni”nə istinadən məlumatına görə, Avropa Komissiyası və Almaniyanın ardınca, Fransa da yeni prezidentin avropalı olmasını istədiyini açıqlayıb. Bu ölkənin namizədi hazırda Fransanın İqtisadiyyat, Maliyyə və Sənaye naziri postunu tutan Kristin Lagardedir.

Lagarde Avropa Komissiyası, Almaniya, İtaliya və İsveç tərəfindən də açıq dəstək alır. İngiltərə isə yeni BVF prezidentinin ya avro bölgəsindən, ya da Asiyadan seçilməsini arzulayır.

Avropa Birliyi ölkələri 1945-ci ildən bəri əllərində olan BVF postunu itirmək istəmirlər. Namizədlər sırasında Hollandiya Mərkəzi Bankının sədri Nout Vellink, Avropa Mərkəzi Bankının sədri postundan yeni ayrılmış fransız Jan-Clod Triçet və Belçikanın maliyyə naziri Didye Reynders də var. Ancaq buna baxmayaraq, ən real namizəd fransalı Lagarde sayılır.

Kristin Lagarde kimdir?

O, 1956-cı yanvarın 1-də Parisdə doğulub. ABŞ-da oxuyub. 1981-ci ildə dünyanın ən böyük hüquq şirkətlərindən olan “Baker&McKenzie”də fəaliyyətə başlayıb. 25 il burada işlədikdən sonra 1999-cu ildə şirkətin idarə heyətinə sədr seçilib. Fransada 2005-2007-ci illərdə xarici ticarət, 2007-ci ildə az müddət kənd təsərrüfatı və balıqçılıq naziri postunu tutub. 2007-ci ildən bu yana isə İqtisadiyyat, Maliyyə və Sənaye naziri vəzifəsindədir.