BFV Azərbaycandan niyə gedir?

Qurumun Bakı ofisinin rəhbəri bunu Azərbaycan hökumətinin makroiqtisadi sahədə geniş təcrübə qazanması ilə əlaqələndirir

Beynəlxalq Valyuta Fondu (BVF) Azərbaycandakı nümayəndəsini geri çağırıb. Bundan sonra fondun Bakıdakı ofisində hələlik bir menecer, daha sonra menecer və iqtisadçı fəaliyyət göstərəcək.

Lent.az-ın məlumatına görə, BVF-nin Bakıdakı sonuncu nümayəndəsi Koba Qvenetadze jurnalistlərə açıqlamasında belə deyib. Onun sözlərinə görə, Azərbaycan hökuməti artıq makroiqtisadi sahədə xeyli təcrübə qazanıb və bu səbəbdən Bakıda nümayəndənin olmasına ehtiyac yoxdur. Koba Qvenetadze deyib ki, indi Azərbaycan iqtisadiyyatı qlobal maliyyə böhranında özünü daha yaxşı göstərir.

Bununla belə, BVF-nin Bakı ofisi Azərbaycan hökuməti ilə məsləhətləşmələri davam etdirəcək. Koba Qvenetadze bildirib ki, ofisin göndərdiyi məlumatlar təhlil olunacaq və missiyalar Bakıya səfər edəcək: “Fond bu cür əməkdaşlığı Qazaxıstanda və Özbəkistanda da həyata keçirir. Nümayəndələri isə BVF əsasən proqram həyata keçirdiyi ölkələrdə saxlayır”.

Xatırladaq ki, Azərbaycan 1992-ci ildən BVF-nin üzvüdür. İndiyədək fondun Bakıdakı daimi nümayəndəliyinini 6 rəhbəri olub. Onlardan sonuncusu Koba Qvenetadzedir. Onun səlahiyyət müddəti oktyabrın 9-da başa çatır. Artıq daimi nümayəndəliyin rəhbərinin Azərbaycanı tərk etməsi üçün artıq hazırlıq işlərinə başlanıb.

BVF Azərbaycanda daimi nümayəndəliyini bağlayan ilk iri beynəlxalq maliyyə qurumudur.

Elxan SALAHOV