Kənd təsərrüfatında 3,8 faiz azalma

Azərbaycanda taxılçılıq, kartofçuluq, tərəvəzçilik, meyvəçilik - bütövlükdə əsas kənd təsərrüfatı məhsullarının yığımı başa çatmaq üzrədir.

Dövlət Statistika Komitəsindən Lent.az-a bildiriblər ki, noyabrın 1-dək tarlalardan qarğıdalı ilə birlikdə 1999,0 min ton taxıl, 953,5 min ton kartof, 1157,4 min ton tərəvəz, 560,2 min ton meyvə və giləmeyvə, 433,0 min ton bostan məhsulları, 108,3 min ton üzüm, 3,1 min ton tütün, 179,0 min ton şəkər çuğunduru, 530,5 ton yaşıl çay yarpağı toplanıb. Bu ayın əvvəlinə 28,1 min ton pambıq toplanıb emal müəssisələrinə təhvil verilib.

Komitənin hesablamalarına görə, bitkiçilik məhsulları ilə yanaşı heyvandarlıq məhsulları istehsalı da dinamik olaraq artır. Belə ki, ilin əvvəlindən keçən vaxt ərzində diri çəkidə 271,7 min ton ət, 1281,1 min ton süd, 992,9 milyon ədəd yumurta və 15,3 min ton yun istehsal olunub. 2009-cu ilin müvafiq dövrünə nisbətən ət istehsalı 6,9 faiz, süd istehsalı 7,6 faiz, yumurta istehsalı 0,1 faiz, yun istehsalı 3,1 faiz artıb.

Beləliklə, bitkiçilik sahəsində məhsul istehsalı 10,1 faiz azalıb. Heyvandarlıq sahəsində 6,4 faiz artıb, kənd təsərrüfatının ümumi məhsulu isə ötən ilki səviyyədən 3,8 faiz aşağı olub. Komitənin hesablamalarına görə, kənd yerlərində gələn ilin məhsulu üçün 714,1 min hektar sahədə şumlama aparılıb, 332,8 min hektar sahədə dən üçün taxıl, o cümlədən 204,2 min hektar sahədə buğda, 128,6 min hektar sahədə arpa səpilib.

Elxan SALAHOV