İqtisadi inkişaf məsələləri Neftçalada müzakirə olunub

İqtisadi İnkişaf Nazirliyinin dəstəyi, Nazirliyin Bakı Biznes Tədris Mərkəzinin təşkilatçılığı ilə təşkil olunan tədbirdə rayonda fəaliyyət göstərən 100-dən çox sahibkar iştirak edib.

İqtisadi İnkişaf Nazirliyinin mətbuat xidmətindən Lent.az-a bildiriblər ki, tədbirdə ölkə iqtisadiyyatının inkişaf perspektivlərindən, regionların inkişafında dövlət proqramlarının uğurlu icrasının əhəmiyyətindən danışılıb. Bakı Biznes Tədris Mərkəzinin direktoru Akif Fərruxov çıxışında sahibkarlığın inkişafına dövlət dəstəyinin əsas komponentlərindən biri kimi sahibkarların və sahibkarlıq fəaliyyətinə yeni başlamaq istəyənlərin maarifləndirilməsi olduğunu söyləyib.

Tədbir çərçivəsində İqtisadi İnkişaf Nazirliyinin İqtisadi İslahatlar Elmi-Tədqiqat İnstitutunun şöbə müdiri Nurəddin Eynullayev “Biznesdə risklərin idarə edilməsi” və “Biznesin sığortalanması” mövzularında məruzələrlə çıxış edib.

Sonda sahibkarlara Bakı Biznes Tədris Mərkəzinin hazırladığı “Sahibkarlar üçün: sığorta haqqında zəruri biliklər” məlumat kitabçası və digər metodiki vəsaitlər paylanıb.

Elxan SALAHOV