Mərkəzi Bankda “MasterCard Worldwide” kartlarının imkanları barədə təqdimat keçirildi

Azərbaycan Mərkəzi Bankı tərəfindən “MasterCard Worldwide” beynəlxalq kart təşkilatının nümayəndələrinin iştirakı ilə ölkədə fəaliyyət göstərən və həmin beynəlxalq kart təşkilatının üzvü olan kommersiya banklarının nümayəndələri üçün seminar təşkil edilib. Bu barədə Lent.az-a Mərkəzi Bankın mətbuat xidmətindən bildirilib.

Seminarda “MasterCard Worldwide” təşkilatının Azərbaycan üzrə yeni meneceri Hakan Acar və regional direktor Mete Güney təşkilatın əsas fəaliyyəti, təsərrüfat subyektləri ilə qarşılıqlı əlaqələrin genişləndirilməsi və ödəniş kartları bazarında uğurlu marketinqin istiqamətləri, o cümlədən öncədən ödənilmiş kart məhsulları və kontaksız ödəmə kartları üzrə beynəlxalq təcrübə, bu sahədəki yeni texnologiyalar haqqında məlumat veriblər. Seminarda həmçinin “MasterCard Worldwide” beynəlxalq kart təşkilatının “MoneySend” pulköçürmə sistemi haqqında da iştirakçılara ətraflı danışılıb.

Onlar həmçinin, Azərbaycanın “MasterCard Worldwide” təşkilatının ən önəmli tərəfdaşı olduğunu və bu istiqamətdə qarşılıqlı əlaqələrin daha da genişləndirilməsinin vacibliyini vurğulayıblar.

Seminar zamanı “MasterCard Worldwide” beynəlxalq kart təşkilatının nümayəndələri iştirakçıların suallarını cavablandırıblar.