Əmanətlərin qaytarılmasına dair sənəd hazırlanıb

Layihəyə əsasən, batmış əmanətin 3 rubla 1 manat nisbətində qaytarılmasını nəzərdə tutur

Azərbaycanda sovet banklarında qalmış əmanətlərin sahiblərinə qaytarılması ilə bağlı qanun layihəsi hazırlanıb. Sənəd vəsaitlərin 6 il müddətində 3 mərhələdə sahiblərinə qaytarılmasını nəzərdə tutur.

Milli Məclisin iqtisadi siyasət komitəsinin üzvü, millət vəkili Əli Məsimli Lent.az-a bildirib ki, layihə yaxın vaxtlarda Milli Məclisdə müzakirəyə çıxarılacağı gözlənilir. Onun sözlərinə görə, artıq sənəd parlamentdə yaradılmış işçi qrupa təqdim olunub.

Əli Məsimli deyir ki, əhalinin sovet banklarında batmış əmanətlərinin qaytarılmasının hüquqi bazasını təşkil edən bu sənəd MDB məkanında hazırlanmış ən mükəmməl qanun layihəsi sayıla bilər. Onun sözlərinə görə, Azərbaycan batmış əmanətlərin qaytarılması ilə bağlı Litva modelinə üstünlük verib. Layihəyə əsasən, batmış əmanətin 3 rubla 1 manat nisbətində qaytarılmasını nəzərdə tutur. Bu vəsaitin ödənilməsi üçün isə təxminən 1,1 milyard manata ehtiyac olacaq.

Elxan SALAHOV