BP-nin iflası gündəmə gəldi

Səhmlərin qiyməti sürətlə düşür, ancaq tələsik açıqlama yayan şirkət hələ də maliyyə durumunun güclü iddia etdi

Meksika körfəzində baş verən qəzadan 1,5 ay sonra ilk dəfə Böyük Britaniyanın nəhəng neft şirkəti olan BP-nin iflas riski gündəmə gəlib. Lent.az-ın “Fortuna” dərgisinə istinadən verdiyi məlumata görə, bu dərgiyə açıqlama verən tanınmış neft mütəxəssisi Matt Simmons BP-nin 1 ay ərzində iflas edə biləcəyini söyləyib.

O deyib ki, Meksika körfəzindəki quyudan sızan nefti təmizləmək üçün milyardlarla dollar lazımdır, digər tərəfdən, şirkət ABŞ hökuməti tərəfindən qanuni yollarla maliyyə cəzasına məruz qalacaq. BP təxminən 28 milyard dollar ziyan çəkəcək. Matt Simmons bunun qarşılığında BP-nin iflasının qaçılmaz olacağı qənaətindədir.

Bu gün Nyu-York birjasında BP-nin səhmləri 15 faiz qiymətdən düşüb. Bu, son 14 ildə qeydə alınan ən aşağı göstəricidir. BP şirkəti isə bu gün tələsik açıqlama yayıb və şirkətin iflası üçün əsaslı səbəb olmadığını, Meksika körfəzində baş verən qəza və onun nəticələrini aradan qaldıracaq potensialda olduğunu vurğulayıb.

Qeyd edək ki, BP Azərbaycanda əsas neft müqavilələrinin və BTC-nin operatorudur.