Goranboyun bir hissəsini alıb Naftalana verdilər

Milli Məclisin bu gün keçirilən iclasında Goranboy rayonunun və Naftalan şəhərinin inzibati ərazi bölgüsünə dəyişiklik edilməsi ilə bağlı qanun layihəsi müzakirə olunub. Lent.az-ın xəbərinə görə, layihə haqqında Regional Məsələlər Komitəsinin sədr müavini Tahir Rzayev məlumat verib.

Müzakirələr zamanı çıxış edən millət vəkili Gültəkin Hacıbəyli son illərdə Naftalana edilən qayğıdan danışıb. O bildirib ki, son 3-4 ay ərzində həyata keçirilən işlər rayonun inkişafına böyük təsir göstərib: “Lakin rayonun ərazisinin məhdud olması yeni obyektlərin tikilməsinə mane olur. Goranboyun Naftalana yaxın əraziləri var ki, onlar Naftalana verildikdən sonra rayonun ərazisində daha yüksək nəticələr əldə olunacaq”.

Daha sonra çıxış edən millət vəkili Nəsib Nəsibli “rayon” sözü ilə bağlı etirazlarını ifadə edib. O bildirib ki, Azərbaycanda “qəza”, “mahal” sözlərlə yanaşı “bölgə” ifadəsi var ki, “rayon” onlarla əvəz edilə bilər.

Müzakirələrdən sonra layihə qəbul olunub. Qanuna əsasən Goranboyun bəzi əraziləri Naftalana verilib.

Pərvin ABBASOV