Nəqliyyat Nazirliyi yolları seldən qorumaq üçün səfərbər olunub

Fəlakət bölgəsində magistral yolların dağılmasının qarşısını almaq üçün Bakıdan əlavə texnika və canlı iş qüvvəsi göndərilib

Mil-Muğan bölgəsində baş verən subasma nəticəsində Şirvan, İmişli, Sabirabad rayonlarında və yaxın ərazilərdən keçən magistral avtomobil yolları dağılma təhlükəsi ilə üzləşib. Bu səbəbdən də Nəqliyyat Nazirliyi yolların subasmadan qorunması məqsədilə gücləndirilmiş iş rejimində işləyir.

Nazirliyin mətbuat katibliyindən Lent.az-a bildiriblər ki, hazırda Yol-İstismar idarələri sel sularının yaratdığı fəsadları aradan qaldırmaq üçün gücləndirilmiş iş rejimində fəaliyyətini davam etdirir. Həmçinin Bakıdan göndərilmiş texnika və işçi qüvvəsinin köməkliyi ilə Şirvan, İmişli, Sabirabad rayonlarında, ətraf ərazilərdə su altında qalmış, sıradan çıxmış avtomobil yollar təmir edilir, alternativ yollar salınır. Belə ki, Padar istiqamətində yeni salınmış 19 kilometrlik yol avtomobillərin hərəkətinin bərpa edilməsi üçün əhəmiyyətli rol oynayır.

Nazirlikdə bildirirlər ki, bu gün Sabirabad rayonu ərazisində 12 kilometrlik Həşimxanlı-Qaratəpə yolunun gediş-gəliş üçün normal vəziyyətə gətirilməsi gözlənilir. İşlərin sürətləndirilməsi məqsədilə əlavə olaraq Bakıdan hər gün, təxminən, 15-20 maşın yük aparılır.

Hazırda Nəqliyyat Nazirliyinin müvafiq qurumları və strukturları təbii fəlakət zonasında 3 növbəli iş rejimini davam etdirir. Bir neçə gün ərzində Saatlı rayonu ərazisində 16 kilometrlik Musalı-Məzrəli avtomobil yolunun 6 kilometri artıq bərpa edilib. Həmçinin Hacıqabul-Bəhramtəpə yolunun 68-ci kilometrliyində yerləşən körpü avtomobillərin və insanların intensiv hərəkətini nəzərə alaraq, həmçinin yüklərin daşınmasını təmin etmək məqsədilə müvəqqəti olaraq açılıb. Əsas məqsəd əhalinin və ətraf kəndlərin təhlükəsizliyini qorumaq, həmçinin magistral yolların sel suları tərəfindən yuyulmasının qarşısını almaqdır.

Elxan SALAHOV