Slovakiya-Azərbaycan biznes forumu keçirilib

Bakıda keçirilən tədbirdə Azərbaycan və Slovakiyadan olan sahibkarlar arasında qarşılıqlı əlaqələr və əməkdaşlıq perspektivləri müzakirə olunub

Bu gün Bakı Biznes Mərkəzində Slovakiya-Azərbaycan biznes forum keçirilib. Slovakiyanın Xarici İşlər naziri Miroslav Layçakın Azərbaycana səfəri çərçivəsində təşkil olunan forum İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) və Slovakiyanın İnvestisiya və Ticarətin İnkişafı Agentliyinin təşkilatçılığı ilə baş tutub.

İqtisadi İnkişaf Nazirliyindən Lent.az-a bildiriblər ki, tədbirdə Azərbaycan və Slovakiya tərəfdən dövlət rəsmiləri ilə yanaşı, kənd təsərrüfatı, informasiya-kommunikasiya texnologiyaları, bank, tikinti, sənaye və digər sahələrdə fəaliyyət göstərən 40-a yaxın şirkətin nümayəndəsi iştirak edib. Biznes forumdan əvvəl slovakiyalı qonaqlar Bakı Biznes Mərkəzində yerli şirkətlərin istehsal etdiyi məhsullardan ibarət sərgi ilə tanış olublar.

Tədbirdə AZPROMO və Slovakiyanın İnvestisiya və Ticarətin İnkişafı Agentliyi tərəfindən hər iki ölkənin investisiya imkanları, Azərbaycan İnvestisiya Şirkəti tərəfindən isə qurumun fəaliyyəti ilə bağlı təqdimatlar keçirilib. Biznes forum iş adamları arasında ikitərəfli görüşlərlə davam edib. Görüşlərdə Azərbaycan və Slovakiyadan olan sahibkarlar arasında qarşılıqlı əlaqələr və əməkdaşlıq perspektivləri müzakirə olunub.

Elxan SALAHOV