FHN 966 tikintilə bağlı xəbərdarlıq edib

544 obyektin elektrik enerjisi və su təchizatı dayandırılması barədə aidiyyatı orqanlara müraciət olunub

2009-cu ildə Fövqəladə Hallar Nazirliyi (FHN) tərəfindən təyinatından asılı olmayaraq fiziki və hüquqi şəxslərin tikinti işləri apardığı 2421 obyektdə tikinti norma və qaydaları tələblərinin, layihəyə uyğunluğunun, təhlükəsizlik tədbirlərinin yerinə yetirilməsinin, görülən işlərə texniki nəzarətin və müəllif nəzarətinin aparılmasının təmin olunması ilə əlaqədar olaraq yoxlama işləri aparılıb.

Lent.az-ın xəbərinə görə, bu barədə Azərbaycan Nazirlər Kabinetinin 2009-cu il fəaliyyəti haqqında olan hesabatında bildirilib. Yoxlama işlərinin nəticəsində aşkar edilmiş nöqsanların aradan qaldırılması məqsədilə 966 obyekt üzrə müvafiq xəbərdarlıq edilib. Nöqsanların aradan qaldırılmasını təmin etməyən 544 obyektin elektrik enerjisi və su təchizatı dayandırılması barədə aidiyyatı orqanlara müraciət olunub.

Layihə sənədləri ekspertizadan keçirilməyən, lakin tikinti işləri davam edən 59 obyekt barədə ciddi tədbirlər görülməsi məqsədilə müvafiq sənədlər hazırlanaraq aidiyyatı üzrə təqdim edilib.

Pərvin ABBASOV