Azərbaycan “Beynəlxalq Yaşıl Həftə - 2010” sərgisinə qatılacaq

Sərgidə Azərbaycan istehsalı olan kənd təsərrüfatı və yeyinti məhsulları nümayiş olunacaq

Yanvarın 15-dən 24-dək Almaniya Federativ Respublikasının paytaxtı Berlində ənənəvi “Beynəlxalq Yaşıl Həftə - 2010” sərgisi keçiriləcək. Sərgidə İqtisadi İnkişaf və Kənd Təsərrüfatı nazirliklərinin, Azərbaycanda İxracın və İnvestisiyaların Təşviqi Fondunun (AZPROMO) və 10-dan çox şirkətin nümayəndələri iştirak edəcək.

İqtisadi İnkişaf Nazirliyindən Lent.az-a bildiriblər ki, 1926-cı ildən müntəzəm olaraq keçirilən sərgiyə Azərbaycan 3-cü dəfədir qatılır. Sərgidə əsasən, kənd təsərrüfatı və yeyinti sənayesi məhsulları nümayiş olunur. Avropanın ən iri sərgisi hesab olunan ənənəvi “Beynəlxalq Yaşıl Həftə”də dünyanın 60-dan çox ölkəsinin iştirak edəcəyi gözlənilir.

Nazirlikdə deyirlər ki, sərgi istehsalçı şirkətlərin məhsullarının nümayişi, müəssisənin imicinin formalaşdırılması, yeni tərəfdaşlıq əlaqələrinin yaradılması və əməkdaşlığın genişləndirilməsində xüsusilə əhəmiyyətlidir. Tədbirdə Azərbaycan üçün ayrılmış pavilyonda müxtəlif kənd təsərrüfatı və yeyinti məhsulları nümayiş olunacaq. İştirakçılara Azərbaycan haqqında müxtəlif çap materialları, jurnallar, disklər paylanacaq.

“Beynəlxalq Yaşıl Həftə - 2010” sərgisi çərçivəsində elmi-praktiki konfransların və forumların keçirilməsi, həmçinin bioloji enerji, ekoloji təmiz məhsullar və sağlam qidalanma mövzularında müzakirələrin təşkili nəzərdə tutulur.

Elxan SALAHOV