Naxçıvandan Birləşmiş Ərəb Əmirliklərinə aviareyslər açıla bilər

Naxçıvan Muxtar Respublikası (NMR) ilə Birləşmiş Ərəb Əmirlikləri (BƏƏ) arasında birbaşa aviareyslər təşkil oluna bilər. NMR İqtisadi İnkişaf Nazirliyindən Lent.az-a verilən məlumata görə, BƏƏ-nin paytaxtı Abu-Dabi şəhərində Azərbaycan Respublikası Hökuməti və BƏƏ Hökuməti arasında iqtisadi, ticarət və texniki əməkdaşlıq üzrə birgə Hökumətlərarası Komissiyanın ikinci iclası çərçivəsində keçirilən görüşlərdə bu və digər sahələrdə əməkdaşlıq imkanlarının araşdırılması barədə ilkin razılıq əldə olunub.

Gələcək əməkdaşlıq proqramı çərçivəsində muxtar respublikadan süfrə mineral sularının ixracı və turizm sahəsində əməkdaşlıq imkanları da araşdırılacaq, Xüsusi İqtisadi Zonaların yaradılması və idarə olunması sahəsində tərəflər arasında məlumat mübadiləsinin aparılacaq.

Qeyd edək ki, komissiyanın iclasında Azərbaycan Respublikasının dövlət rəsmiləri ilə yanaşı, Naxçıvan Muxtar Respublikasının iqtisadi inkişaf naziri və muxtar respublikanın iş adamlarından ibarət nümayəndə heyəti iştirak edib.

Səfər çərçivəsində Azərbaycan və Birləşmiş Ərəb Əmirlikləri iş adamlarının iştirakı ilə biznes-forum da təşkil olunub.

Fariz YUNİSLİ