Karlos Teves “Yuventus”da

İtaliya “Yuventus”u İngiltərənin “Mançester Siti” komandasının futbolçusu Karlos Tevesi transfer edib. Lent.az-ın Turin klubunun rəsmi saytına istinadən verdiyi məlumata görə, argentinalı hücumçu ilə 30 iyun 2016-cı ilədək müqavilə bağlanılıb.

İtaliya mətbuatı Tevesin “Yuve”yə 9 milyon avroya başa gəldiyini yazıb. Futbolçu uğurla çıxış edəcəyi təqdirdə, “Mançester Siti” daha 3 milyon avro qazana bilər. Teves yeni klubunda 10 nömrəli formada çıxış edəcək. Bu forma əvvəllər Alessandro Del Pyeroya məxsus olub. Del Pyero “Yuve”ni 2012-ci ilin avqustunda tərk edərək, Avstraliya “Sidney”inə yollanıb.

Qeyd edək ki, Karlos Teves futbolçu karyerasına Argentina “Boka Huniors”unda başlayıb. O, 2006-cı ildə Braziliya “Korintians”ına, növbəti mövsüm isə İngiltərə “Vest Hem”inə yollanıb. Daha 2 mövsüm “Mançester Yunayted”in formasını geyindikdən sonra Teves 2009-cu ilin iyununda “Mançester Siti”yə keçib. 29 yaşlı forvard “qırmızı şeytanlar”la 2 dəfə İngiltərə çempionu və 2008-ci ildə Çempionlar Liqasının qalibi olduğu halda, “şəhərlilər”in heyətində yalnız çempionluqla kifayətlənib. Teves Argentina yığmasında isə 64 oyuna 13 qol vurub, 2006 və 2010-cu il dünya çempionatlarının iştirakçısı olub.