Hasan Şaş “Qalatasaray”ı “baltaladı”: “Siçan-pişik oyunu izlədik”

“Qalatasaray”ın Çempionlar Liqasında Dortmund “Borussiya”sına biabırçı (0:4) məğlubiyyəti Türkiyə futbol ictimaiyyətini qəzəbləndirib. Lent.az-ın məlumatına görə, İstanbul klubunun sabiq futbolçusu və məşqçisi Hasan Şaş “cim-bom”u sərt tənqid edib: “Çox məyus oldum. “Qalatasaray” “Borussiya” səviyyəsində komanda olmaya bilər. Ancaq bu əsas vermir ki, öz meydanında bu qədər əziləsən. “Qalatasaray”lı futbolçular düzgün oynaya bilmədilər. Top almanların ayağına keçdikdə pişik siçanla necə oynayırsa, bizimlə elə oynamağa başladılar. Bir sözlə, meydanda siçan-pişik oyunu izlədik. İnanın ki, “Borussiya” çempionat oyununu fikirləşdiyi üçün 4 qolla kifayətləndi. Əgər istəsəydilər, 6 qol da vurardılar. “Qalatasaray”da lazımsız futbolçular çoxdur. Pandev və Dzemaili transferi çox uğursuzdur”.