Olimpiada-2012: Dünya çempionumuzdan super start

Azərbaycan boksçusu Məhəmmədrəsul Məcidov 2012-ci il London Yay Olimpiya Oyunlarına qələbə ilə başlayıb. Lent.az-ın məlumatına görə, 91 kq-dan yuxarı çəki dərəcəsində yer alan dünya çempionumuz 1/8 finalda konqolu Meji Mvanbanı məğlub edib.

Döyüş Məcidovun aşkar üstünlüyü ilə keçib. Ardıcıl zərbələr ilk raundun sonlarında Mvanbanın nokdauna düşməsi ilə nəticələnib. Lakin o, döyüşü davam etdirib. İlk raunddan idmançımız böyük üstünlüklə ayrılıb – 8:1. İkinci raundda da Məcidov hücumlarını davam etdirib. O, Mvanbanı ikinci dəfə nokdauna salıb. Raundun sonuna təqribən 1 dəqiqə qalmış boksçumuzun zərbəsi o qədər güclü alınıb ki, konqolunun dəbilqəsi başından kənara uçub. Bu zaman Mvanbanın burnundan qan açılıb. Hakim isə döyüşü dayandıraraq, Məcidovu qalib elan edib. Təmsilçimiz ¼ finalda rusiyalı Maqomed Omarovla qarşılaşacaq.

Qeyd edək ki, daha öncə boksçularımızdan Soltan Migitinov 1/8 finala yüksəlib. Elvin Məmişzadə (52 kq), Vətən Hüseynli (81 kq) və Heybətulla Hacıəliyev (64 kq) ilk döyüşdəcə uduzublar. Digər boksçularımıza gəldikdə, bu gecə saat 01:15-də Məhəmməd Əbdülhəmidov (56 kq) 1/8 finalda yaponiyalı Satoşi Şimuzu ilə, saat 01:30-da isə Teymur Məmmədov (91 kq) avstraliyalı Jay Tapu Opetaya ilə üz-üzə gələcək. Avqustun 5-də isə qadın boksçumuz Yelena Vıstropova (75 kq) mübarizəyə qoşulacaq.