Türkiyə futbolunda xuliqan fanatları qadınlar və uşaqlarla əvəzlədilər

Türkiyə Futbol Assosiasiyası yerli klubların oyunlarındakı çaxnaşmalarla mübarizə məqsədilə radikal tədbirlərə əl atıb. Lent.az-ın məlumatına görə, bundan sonra intizam sanksiyalarına məruz qalan komandaların oyunlarına kişilərin girişi qadağan olunacaq.

Əvəzində qadınlar və 12 yaşadək uşaqlar matça pulsuz daxil olacaqlar. Bu qayda ilə ilk görüş sentyabrın 20-də baş tutub. Həmin gün İstanbuldakı “Şükrü Saracoğlu” stadionunda “Fənərbağça” ilə “Manisaspor” arasında keçirilmiş oyunu 41 min qadın və uşaq izləyib. Səbəb kimi “Fənər”in intizam sanksiyasına məruz qalması göstərilib. Stadionun girişində qonaqları qadın polislər qarşılayıblar. Futbolçular onları tribunalara gül atmaqla salamlayıblar.

Qeyd edək ki, 2011-ci ilin iyulunda Ukrayna “Şaxtyor”u ilə keçirdiyi yoldaşlıq görüşünü “Fənərbağça”nın azarkeşləri pozublar. Matçın ikinci hissəsində minlərlə fanat klub prezidenti Aziz Yıldırımın danışılmış oyunlarda iştirakı ilə əlaqədar həbsinə etiraz edərək, meydançaya soxulublar. Azarkeşlər görüşü işıqlandıran jurnalistlərə qarşı da aqressiv davranıblar.