Azərbaycanda oyunların yayım hüququ klublardan alına bilər

Onun sözlərinə görə, ötən mövsüm oyunların yayım hüququ klublara verilsə də, bu, heç də effektli alınmayıb. Çünki telekanallar canlı yayıma o qədər də maraq göstərməyiblər: “Bəzi hallarda oyunların yayımına PFL təşəbbüs göstərsə də, klublar buna mane olublar. Fikrimiz var ki, çempionat öncəsi klublarla görüşək. Bacarmırlarsa, yayım hüququnu öz üzərimizə götürməyə məcburuq. Biz istəyirik ki, televiziya ilə daha çox oyun nümayiş etdirilsin”.

Musayev Azərbaycan çempionu və ölkə kubokunun sahibinin iştirakı ilə Superkubok matçının bərpası ideyasına da münasibət bildirib. Onun fikrincə, bu ideyanın reallaşdırılması üçün indiki halda “Neftçi” və “Xəzər Lənkəran” klublarının razılığı alınmalıdır. Oyun isə Bakı və ya Lənkəranda yox, neytral meydançada keçirilməlidir: “Məsələn, bu, Gəncə ola bilər. Bəziləri “Neftçi”nin 2005-ci ildə “qızıl oyun”da “Xəzər Lənkəran”ı Gəncədə udduğunu əsas gətirərək, həmin şəhərə oyun salmağımızı da bununla əlaqələndirə bilər. Amma Gəncəni misal üçün dedim. Gəncə olmur, İmişli olsun, amma oyun neytral meydançada keçirilsin”.

PFL prezidenti Superkubok matçının yeni mövsümün mövsümün əvvəlində yox, ortasında keçirilməsini daha real sayıb. Onun sözlərinə görə, mövsümün əvvəllərində klublar Avropa kuboklarındakı oyunu düşünəcəklər: “Gələn il mənim bu vəzifəyə seçilməyimin 4 ili tamam olur. İstərdim ki, fəaliyyətim dövründə Superkuboku bərpa etməyimlə də yadda qalım. Yəni, mən bu ideyanın reallaşdırılmasına razı və hazıram. Amma klublar da razı və hazır olmalıdırlar”.