“Bakı” Elvin Məmmədovla 2 illik müqavilə bağladı

“Bakı” klubu son iki mövsümü “Qarabağ”da keçirmiş Azərbaycan milli komandasının futbolçusu Elvin Məmmədovla münasibətlərini rəsmiləşdirib. Bu haqda Lent.az-a klubun Media və Marketinq Departamentinin rəhbəri Nəriman Mehdiyev məlumat verib.

Onun sözlərinə görə, 23 yaşlı yarımmüdafiəçi ilə 2 illik müqavilə bağlanılıb. Anlaşmanın maddi tərəfi açıqlanmır. Mehdiyev bildirib ki, yaxın vaxtlarda daha iki yerli futbolçu ilə sövdələşmənin əldə olunacağı gözlənilir. Bunlar Salyanın “Muğan” komandasından ayrılan 21 yaşlı müdafiəçi Novruz Məmmədovla ötən mövsümü MOİK-də keçirmiş 22 yaşlı müdafiəçi Tural Nərimanovdur.

“Bakı” rəsmisi 8 futbolçudan başqa hələlik heç kiminlə yollarını ayırmadıqlarını bildirib: “Fabio Luis Ramim və Jaba ilə növbəti mövsüm üçün də müqaviləmiz var. İcarə müqaviləsi başa çatan Vaqif Cavadov barədə isə hələ qərar verilməyib”.

Qeyd edək ki, “Bakı” klubu bir neçə gün öncə yerli futbolçulardan müdafiəçi Rafael Əmirbəyov, yarımmüdafiəçi Mahmud Qurbanov, eləcə də fransalı müdafiəçi Stefan Borbikoni, ukraynalı yarımmüdafiəçi Ruslan Leviqa, mərakeşli yarımmüdafiəçi Adnan Bərəkət, braziliyalı yarımmüdafiəçi Junior Osvaldo, moldovalı hücumçu Vyaçeslav Sofroni, bosniya və herseqovinalı hücumçu Saşa Kaykutla yollarını ayırıb.

Elşən MƏMMƏDOV