Anatoli Karpov 60 yaşında

O, 16 il – 1975–1985 və 1993–1999-cu illərdə dünya çempionu adını daşıyıb. Gələcək dünya çempionuna şahmatı 5 yaşında ikən atası öyrədib. 14 yaşında SSRİ idman ustası adını alan Karpov 1969-cu ildə yeniyetmələr arasında dünya çempionu, 1970-ci ildə SSRİ çempionu olub, qrossmeyster adını alıb. Məşhur şahmatçı 1974-cü ildə iddiaçıların turnirini qələbə ilə başa vuraraq, Bobbi Fişerlə dünya çempionluğu uğrunda görüşə hazırlaşıb. Lakin Fişer Beynəlxalq Şahmat Federasiyası (FİDE) ilə danışıqlardan sonra 1975-ci ildə bu görüşdən imtina edib. Nəticədə Karpov 12-ci dünya çempionu elan olunub. O, 1985-ci ildə Harri Kasparova uduzaraq, titulunu itirib. O, 1976, 1983 və 1988-ci illərdə SSRİ çempionu da olub.

Hazırda Anatoli Karpov Dünya Fonduna rəhbərlik edir. FİDE-nin Beynəlxalq Olimpiya Komitəsi və UNESCO-da səfiridir, uşaq şahmatına diqqət ayırmaqla bütün dünyada bu idman növünü fəal təbliğ edir.