“Bakı” daha 7 futbolçuya qapını göstərdi

Lent.az-ın məlumatına görə, komandanın baş məşqçisi Aleksandr Starkov bosniya və herseqovinalı hücumçu Saşa Kaykutun ardından daha 7 futbolçuya qapını göstərib.
Bunlar yerli futbolçulardan müdafiəçi Rafael Əmirbəyov, yarımmüdafiəçi Mahmud Qurbanov, eləcə də fransalı müdafiəçi Stefan Borbikoni, ukraynalı yarımmüdafiəçi Ruslan Leviqa, mərakeşli yarımmüdafiəçi Adnan Bərəkət, braziliyalı yarımmüdafiəçi Junior Osvaldo və moldovalı hücumçu Vyaçeslav Sofronidir. Onların hamısı ilə başa çatan müqavilənin müddəti uzadılmayıb. Artiq Starkov gedənlərin adlarını klub rəhbərliyinə də təqdim edib. Futbolçuların özləri isə bu barədə məlumatlandırılıb. Lakin bununla “təmizləmə əməliyyatı” başa çatmayıb. Yaxın günlərdə “qara siyahı”ya yeni adlar da daxil edilə bilər.

Qeyd edək ki, “Bakı” klubu Unibank Premyer Liqasını 6-cı pillədə başa vurub, NBC Bank Azərbaycan Kubokunda isə yarımfinalda mübarizəni dayandırıb.

Elşən MƏMMƏDOV