Qusar dağlarında çempionat keçiriləcək

Mayın 20- 22-də Hava və Ekstremal İdman Növləri Federasiyasının (FAİREX) təşkilatçılığı və Gənclər və İdman Nazirliyinin dəstəyi ilə Qusar rayonunun Ləzə kəndi yaxınlığındakı təbii qayalarda idman qayayadırmanması üzrə Açıq Respublika Çempionatı keçiriləcək. Bu barədə Lent.az-a Hava və Ekstremal İdman Növləri Federasiyasından məlumat veriblər.

Yarışda FAİREX-in “Salavat”, “Zirvə”, “A+A”, “Ekosport”, “Climb-club”, Azərbaycan Turizm İnstitutunun “AMEAST”, Dövlət Bədən Tərbiyəsi və İdman Akademiyasının “AzDBTİA”, “Qərb Universitetinin idman klubu”nun, o cümlədən digər qurumların idmançıları iştirak edəcək. 60 nəfərdən çox idmançının qatılacağı yarış kişilər və qadınlar arasında iki mərhələdə- mürəkkəblik və boulderinq mərhələlərində keçiriləcək. İdmançılar əvvəlcə təsnifat, daha sonra 1/8, 1/4, 1/2 və final yarışlarında birinci yer uğrunda mübarizə aparacaqlar. Bir həftə sonra isə Qobustan qayalıqlarında sürət mərhələsi təşkil olunacaq. Distansiya və marşrutların təşkili üçün İFSC-nin (Beynəlxalq İdman Qayayadırmanma Federasiyası) tövsiyəsi ilə FAİREX tərəfindən Türkiyədən beynəlxalq dərəcəli mütəxəssis dəvət olunub.

Mübariz Aslanov